Gesäit deng Bezéiung esou aus?

Natierlech net... oder dach e bëssen? Bass du ee Beschützer, ee Kämpfer? Ass hatt deng Prinzessin? Wëlls du an enger Bezéiung déi Roll spillen? A geet et nëmmen ëm d'Spillen? Klischeeën wéi dee vum Ritter an der Prinzessin hunn en Afloss op eist Verhalen A wat geschitt wuel, wann een aus dem Klischee eraus wëllt?

Bedeit "Gläichheet" dann, dass ee seng Frëndinn net méi beschützen däerf, oder dass Meedercher elo bei de Kläppereie matmaachen, dass d'Jonge sech rosa undoen an d'Meedercher bei der Foussball-WM virun der Telé sëtzen a sech eng Béier hannert d'Ouere geheien? A wéi soll dann eng Bezéiung ausgesinn, wann de Jong net méi als macho poséiert an d'Meedchen keng zaart Prinzessin méi ass?

Et gëtt keng fest Regel, wéi een di traditionnell Rolleverdeelung an enger Koppel ännere kann. Do muss een einfach bereed si vum Partner bäizeléieren. Dozou braucht ee Mutt, Kreativitéit an Dialogbereedschaft.

Rollenklischees

Hei geet et och net drëms, dass een d'Rollen ëmtauscht (obschonns et fir Fuesend ganz witzeg ka sinn). Wann ee Klischeeën ëmdréint, da bleiwen dat weiderhi Klischeeën. Wéi eng Bezéiung ausgesäit, dat entscheeden di zwee déi dra sinn. E Meedchen gëtt och ouni de Schutz vu sengem Kolleg eens. An ee Jong braucht kee weiblesche Coach, wann et drëms geet e Geschenk fir Mammendag ze kafen.